Parosifa fain Pol-ke Filemon siisimomak

Miimow opora

Filemon mua unumiya-ke, ne o Kristen kekanowa-ke. Ona owowa Kolosi. Ne mua nain uuwow mua onaiya ikua, unuma Onesimus, eena sesa marew uuwomiya nain. Onesimus-ke Filemon piipuap baurarep owow oko ikiwok. Ikip nan ikaeya opap koora-pa wuiwkin Pol urufak. Ne Pol-ke Yeesus opora maakeya opora opap Kristen arek.

Ne iir nain Pol koora-pa wuiwkin ikua, naeya ikip Filemon urufowa me pepek. Naapeya parosifa muutiw siisimep Onesimus iwemi sesekeya parosifa onaiya Filemon wiar ikiwok. Filemon parosifa-pa feenap maakek, Onesimus aakisa Kristen arek. Naapeya me amukare, o nainiw aawep yena aamun-ke naep urufam-ike, naap maakek.

Philemon

1Aria yo Pol-ke, Yeesus Krais uuwow muuta nain koora-pa efa wuiwkin ikem. I Timoti ikos ni teeria fain parosifa nia siisimomimik, yiena emar eliwa ne uuwow epaskun Filemon, ne yiena ekera Apia ne Arkipus, eena ikos uuwow yoowa akena opam-ikemik nain, ne teeria papako no koora-pa nefar fiirimimik, wi nain pun.

3I feenap nia naimik, yiena Auwa Mua Maneka ne yiena Maneka Yeesus Krais ikos nia kemalemi kema eliwa niuk.

4Aria emar, yo naap nefa miimiyem, no yiena Maneka Yeesus opora kekanowa wiar opin ne ona teeria wia kookalin. Naapeya yo anane nefa naep Mua Maneka faremi sira eliwa naakiyem. 6Ne feenap nokariyem, i Krais teeria unowiya yiam kekanowam-ikok ona teeria-pa ikowa sira unowa nain baliwep akena amisariyen, naap maiyem. 7No Yeesus Krais teeria wia kookalin nain kema wia piran, naapeya yo manek akena kemeliyem, ne kema iikiram.

8Yo feenap nefa maiyen, i yiam erup Krais teeria-ke ne yo ona uuwow mua awona-ke, ne pun o muuta nain koora-pa efa wuiwkin fan ikem. Naapeya o unuma-pa feenap onowa eliw nefa maakinen. Nain nefa kookalep nefa nokariyem. 10Nain uuwow mua Onesimus maiyem. Yo koora ekap ikemkun efar kererek. Kerereya Yeesus opora maakemkun kema kirep teeria wiar ekak. Naapeya yena muuka arowam. Ne aakisa no saliwe naep nefa maakiyem. Yo oram maiyem. 11O iiriw mua karosiya no maa baliwep me uuwam-ikomek. Ne aakisa yo uuwowa baliwep efa asipam-ikaiya, ne ikoka ikip nos pun baliwep uuwam-ikominon.

12Ne aakisa yo yena muuk eliwa fain sesekamkun nefar ikiwiya. 13Yo Yeesus opor eliwa wia maakem-miawiyem nain koora-pa efa wuamik, naapeya yo feenap kookaliyem, os-ke no epa nefar aawep feek ikok efa asipam-ikainon-na eliw, naap maiyem. 14Nain yo opor afila me niiyem, weetak, oram nefa nokarep kookalowa nefa amisarep maa oninen. Nena kookalowa muutiw.

15Aria Onesimus iiriw nefa baurarep fan ekapok nain yo feenap maiyem. Makena, nefa baurarek nain epa me ekak, ne aakisa nefar ikiwiya nain anane maneka nefamiya ikainon. 16Neek ikok no uuwow mua muutiw me nefar ikainon, weetak, o Yeesus teeria-pa ikua, naapeya yena aamun nae. Yo o manek akena kookaliyem ne nos pun ikoka manek akena naap kookalinan, ne pun mainan, yena emar-ke, i epaskun yiena Maneka teeria-pa wiar ikemik, naap mainan.

17Yo nena teeria epaskun-ke efa naep yo efa aawin. Naapeya os pun sira naapiw akena aawe. 18Ne o pina-ko onak-i e maa mauwa nefar aawok-i, maa naap-ko oneya-na muuna nain yo mia-pa efar wue. 19Ne opora fain yo maiyem nain yo yena kakeniw wapena-pa siisimem, muuna nain yos-ke kiripominen. (Ne yo iiriw Yeesus opora nefa maakemkun kema kirep teeria wiar ekan nain maa muuna-ke naep yo me nefa maiyem.) 20Emar, i epaskun Krais teeria-pa ikemik, naapeya sira eliwa, no yiena Maneka unuma-pa yo kookaliyem naap one, ne yo kema teninen.

21No parosifa siisimomemi kema naap wuiyem, yo maa nefa maakiyem nain eliw onominan. Me maa nain muutiw oninan, maa unowa me nefa maakem nain pun iiwawun onomakinan. 22Aria opor oko nefa maakiyem, yo kema feenap wuiyem, ni anane yo efa naep Mua Maneka farep nokariman. Naapeya yo koora ekap ikem fain ara-pa efa weeserowiwkin-na ni niar ikiwinen. Naapeya nena koora-pa inow epa-ko saliwap-puome.

23Aria Epafras pun Yeesus Krais muuta nain koora ekap fan ikua. Aakisa yena efamiya ikok ni eliwa ikeka nia naiya. 24Ne yena uuwow epaskun wiam erepam, Mak, Aristakus, Demas ne Luk, wis pun naap ni eliwa ikeka nia naimik.

25Aria yiena Maneka Yeesus Krais nia kemalep nia asipam-ikainok.